Почнувајки од 2005 година, кога 192 земји-членки на Светската здравствена организација го прогласија за меѓународен, Светскиот ден на крводарителството редовно се одбележува како на глобално ниво така и во Македонија. Неизмерна благодарност до сите крводарители за нивниот благороден чин на дарување, е главната идеја за одбележување на овој датум. 14ти Јуни е избран да се одбележи како Светскиот ден на крводарителството од посебна причина: на денешен ден, во 1868 година, е роден познатиот австриски научник д-р Карл Ландштајнер, чие откритие за системот на крвни групи АБО беше крунисано со Нобеловата награда за физиологија и медицина во 1930 г. Како што се развиваше трансфузиолошката служба во Македонија по Втората светска војна, во 50-тите години на минатиот век, започна соработката за унапредување, регрутирање и задржување на крводарители , заеднички проект меѓу службата за трансфузиологија и Црвениот крст, која продолжува и денес. Пробиштип може да биде горд бидејки многу наши сограѓани се крводарители, а некои од нив оваа бесценета течност што спасува животи ја подариле многу пати во тек на годините. Вредно е да се спомене дека се повеќе млади луѓе стануваат крводарители и со овој хуман чин овозможуваат нечие срце да продолжи да чука. Среќен мегународен ден на крводарителството на сите крводарители од нашата општина. Вашиот хуман гест за некого значи живот.