1377 – Умрел англискиот крал Едвард Трети, кој во текот на владеењето од 1327 година ја освоил Шкотска и ја предизвикал Стогодишната војна со Франција, а во 1340 година се прогласил за крал на земјата.
1813 – Шпанскиот крал Жозеф, брат на францускиот цар Наполеон Први, го напуштил Мадрид и во битката кај Виторија неговата војска ја поразиле силите на британскиот војсководец Артур Велсли, идниот војвода од Велингтон, со што завршило француското владеење со Шпанија.
1818 – Францускиот научник Рене Лаенек во Париз, пред околу 30 лекари го прикажал својот пронајдок: првата слушалка за поставување дијагноза кога се во прашање срцеви и белодробни болести – стетоскопот.
1874 – Умрел Јонас Ангстрем, шведски физичар и астроном. Го истражувал Сончевиот спектар и ја вовел единицата за бранова должина на светлината – ангстрем (А). Роден бил во 1814 година.
1905 – Во Париз е роден Жан Пол Сартр, француски филозоф и писател. Тој бил основоположник на француската егзистенцијалистичка школа и импресивна фигура во современата литература на својата земја. Најпознати негови дела се романите „Тегобност“, „Патишта на слободата“, драмите „Валкани раце“, „Зад затворени врати“, филозофските дела „Битие и ништожност“ и „Критика на дијалектичкиот ум“. Во 1964 година ја добил Нобеловата награда за литература. Умрел во Париз, на 15 април 1980 година.
1908 – Умрел рускиот композитор и диригент Николај Андреевич Римски – Корсаков, член на композиторската група „Големите петмина“. Дела: оперите „Садко“, „Златниот петел“, „Царска невеста“, симфониската композиција „Шехерезада“.
1935 – Во Париз (од 21 до 25 јуни) бил одржан Првиот меѓународен конгрес на писателите, на кој било решено да се основа Меѓународно здружение на писателите за одбрана на културата.
1954 – Во с. Слатино, Охридско, е роден Бранко Цветкоски – поет, литературен критичар, публицист, преведувач и издавач. Работел како новинар, уредник и менаџер во културни институции, еден е од основачите на Балканската книжевна фондација „Балканика“ и основач на ИК „Макавеј“. Член е на ДПМ, на Македонскиот ПЕН центар, почесен член на Сојузот на бугарските писатели и член-координатор за Македонија на Славјанската литературна и уметничка академија од Варна. Автор е на триесетина книги поезија, критика и есеистика и на четириесетина преведени и препеани книги од странски автори, главно од словенските јазици. Неговата поезија е објавена во одделни книги на 20 странски јазици. Носител е на бројни врвни македонски и меѓународни државни и книжевни награди, меѓу кои: „Св. Климент Охридски“, „Браќа Миладиновци“, „Григор Прличев“, „Димитар Митрев“, „Христо Ботев“,„Европски орден на ООН за култура“, „Владимир Мајаковски“, „Сергеј Есенин“ и „Летечко перо“ на Фетивалот на словенски земји во Варна. Негови најважни книжевни дела се: „Свијок“, „Пресна пепел“, „Високи ветрови“, „Молитвен веј“, „Името, родот, имотот“, „Земја за зобање“, „Имиња и теми“, „Вечноста и мигот“, „Стреа на ветровите“, „Оган во обрачи“. Во 2014 година, по повод 60-годишнината, излегоа неговите Избрани дела во 6 томови.
1990 – Во Унгарија повторно била отворена берзата, по 42 години откако била затворена со одлука на комунистичката влада која ја презеле власта по Втората светска војна.
1969 – Умрела американската тенисерка Морин Коноли, наречена Малата Мо, која во 1953 година станала првата тенисерка во историјата на „белиот спорт“, која ги освоила сите четири Грен слем турнири.
1994 – Република Македонија и Република Киргистан воспоставиле дипломатски односи на ниво на амбасади.
1996 – Република Македонија и Туркменистан воспоставиле дипломатски односи на амбасадорско ниво.
2008 – Ферибот, со повеќе од 700 патници и членови на екипажот потонал во водите на Филипини. Фериботот „Принцеза ѕвезда“ на кој се наоѓале 620 патници и 121 член на екипажот пловел од Манила кон провинцијата Цебу кога дошло до потонувањето. Причината за трагедијата најверојатно бил тајфунот „Фензен“.
