Д-р Емилија Милановска – Матичен доктор
ХЕМОРОИДИ
Хемороидите се проширени и воспалени крвни садови во и околу анусот и долниот дел на ректумот ( долните делови на дебелото црево ) .
Тие се едно од најчестите заболувања кај луѓето што имаат тенденција да рецидивираат ( да се повторуваат ).
Дури половина од луѓето во тек на животот ќе се соочат со овој проблем до својата 50та година.
Хемороидите се честа појава во текот на бременоста ( зголемен притисок во абдоменот, хормонални промени, запек, зголемување на телесната тежина ), овие хемороиди најчесто исчезнуваат по породувањето.
Непријатно чувство во пределот на анусот со болка, силно пецкање, чешање и крварење се знаци на хемороиди кои никако не смеат да се игнорираат.
Симптоми на хемороиди:
– иритација, чешање, непријатно пецкање околу аналната регија
– отеченост околу анусот
– израсток во близина на анусот
– безболно крварење при празнење на цревата ( дефекација)
Дијагнозата се поставува со клинички преглед кој вклучува и ректално туше за да се исклучат посериозни заболувања и понекогаш е потребно да се изврши специјален преглед како ректоскопија.
Постојат два вида на хемороиди:
– внатрешни, кои се внатре, во долниот дел на ректумот и не се гледаат при надворешен преглед
– надворешни, кои се видливи и надвор од анусот
Лекување:
– користење на креми, масти и чепчиња кои се нанесуваат локално, постои голем асортиман на креми и други препарати и затоа треба задолжителна консултација со вашиот матичен доктор околу изборот на терапијата
Сапуни, шампон и други средства за туширање можат само дополнително да ги иритираат хемороидите.
Истото се однесува и на влажните марамчиња, па затоа треба да се избегнуваат кога веќе се појавени хемороидите.
Хигиената одржувајте ја со туширање и миење со топла до млака вода.
Не користете сува тоалетна хартија, областа нежно избришете ја со чиста крпа со тапкање.
Внасете промени во исхраната и животниот стил:
– се препорачува исхрана која вклучува повеќе свежо овошје, зеленчук и житарки богати со растителни влакна
– пијте многу течности
– избегнувајте долго седење и бидете физички активни. Ако вашата професија е повеќе со седење, правете почести паузи со раздвижување и умерена физичка активност
– не кревајте често тешки предмети
– избегнувајте лута храна
– не пијте често газирани сокови
Ако крварењето е често, имате анемија или сте повозрасни, потребно е да се направат дополнителни иследувања како што е колоноскопија.