Д-р Емилија Милановска – Матичен доктор
ПРАЗНИЧНО ТРУЕЊЕ СО АЛКОХОЛ
Како што се приближуваат празничните денови, со овој пост сакам да ви обрнам внимание на опасностите од акутното труење – ИНТОКСИКАЦИЈА СО АЛКОХОЛ.
Акутното труење со алкохол е сериозна, а понекогаш и смртоносна последица на внесување, конзумирање на големи количини на алкохол во краток временски период.
За разлика од храната, алкохолот се апсорбира многу побргу од повеќето други хранливи материи, а на телото му е потребно многу подолго време да се ослободи од алкохолот кој е внесен.
Ресорпцијата на алкохолот зависи од повеќе фактори:
– моменталната здравствена состојба
– присуство или отсуство на храна во желудникот и цревата
– времето, брзината на внесување на алкохолот
– јачината и количината на внесениот алкохол
Елиминацијата на алкохолот од организмот се случува преку црниот дроб во најголем дел (85-90%), мал дел во другите ткива, а 10-15% не променет алкохолот се елиминира преку издишаниот воздух, урината и преку потење.
Симптоми во поедини фази на алкохолизираност:
– до 0,5 промили во крвта се мисли дека нема клинички знаци или пак постоење на многу мали промени на слухот и видот
– од 0,5 до 1,5 промили се јавува емоционална лабилност, промена на говорот, пореметување на движењето, преценување на сопствената способност на паметење и запазување, нарушена координација на движења, намалена адаптација на темно и светло, се намалува видот и слухот за 30-40%
– од 1,5 до 2,5 промили има нарушени интелектуални функции, често вртоглавица и повраќање, се губи самокритичноста и контролата, постои временска и просторна дезориентација, нестабилност при одење, замаглен вид, а можен е и губиток на свест
– од 2,5 до 3,5 промили има дупло гледање, почест губиток на свеста, поспаност, нестабилно одење, гадење, повраќање
– од 3,5 до 4 промили настапува општа слика на труење со тешка психомоторна одземеност, почест губиток на свеста, некогаш и кома
– над 4,0 промили алкохол во крвта се смета за смртоносно труење поради парализа на центарор за дишење и кардиоваскуларниот центар во мозокот
Како да се постапи со лице кое е интоксицирано со алкохол:
– најпрво треба да се отстранат сите алкохолни пијалоци од околината на интоксицираното лице
– треба да се одведе на сигурно место каде нема опасност од паѓање и повреди
– ако лицето управувало со возило, треба да се спречи да продолжи да вози
– да се дознае дали лицето користело лекови или некои дроги
– кофеинот и туширањето имаат краткотраен подобрувачки ефект
Не постои брз начин или лекови кои ќе го поништат дејството на труењето со алкохол.
Ако состојбата на затруениот е сериозна треба да се однесе до најблиската здравствена установа или да се повика итна служба.
За крај ви посакувам СРЕЌНИ И ВЕСЕЛИ ПРАЗНИЦИ и бидете внимателни со внесот на алкохол.
